Talabalar dekanati (yoshlar bilan ishlash, ma’naviyat va ma’rifat)

Talabalar dekanati O‘zbekiston Respublikasi Prezidentining 2022-yil 8-noyabrdagi “Arxitektura-qurilish sohasida kadrlar tayyorlash tizimini yanada takomillashtirish chora-tadbirlari to‘g‘risida”gi PQ-416-son qaroriga asosan universitetning yangi tuzilmasida tashkil etilgan. Dekanat tarkibida quyidagi bo‘limlar faoliyat yuritadi:

• Talaba klublari;
• Salomatlik va sport;
• Alumni ofisi;
• Psixologik xizmat ko‘rsatish ofisi.

Dekanat universitetdagi ma’naviy-ma’rifiy ishlarga boshchilik qilish, ushbu sohadagi normativ hujjatlar ijrosini muvofiqlashtirish, fakultet, bo‘lim va kafedralarning ma’naviy-ma’rifiy tajribasini umumlashtirish, adabiyotlar tayyorlash va nashr etish hamda talabalarning ma’naviy dunyosini shakllantirishga qaratilgan chora-tadbirlarni amalga oshirish uchun tuzilgan.

• dekanat rektor buyrug‘i asosida tuziladi;
• dekanat ishchi guruhi sohaning yetakchi mutaxassislari va professor-o‘qituvchilardan iborat;
• dekanat ma’naviy-axloqiy ishlar bo‘yicha prorektor rahbarligida ishlaydi;
• fakultet dekanlari, bo‘lim boshliqlari, kafedralar va guruh rahbarlari bilan hamkorlikda ish olib boradi;
• Oliy va o‘rta maxsus ta’lim vazirligi huzuridagi Ma’naviyat va ma’rifat markazi nizomi hamda joriy va istiqboldagi ish rejalari asosida faoliyat yuritadi.

Dekanatning maqsadi — talaba-yoshlarni milliy va umuminsoniy qadriyatlarga sadoqat ruhida tarbiyalash, ularning ma’naviy-estetik dunyoqarashini kengaytirish, tafakkurini yuksaltirish, turli ommaviy madaniyat xurujlaridan asrash va ularni Vatanning fidoyi farzandlari etib voyaga yetkazish.

Vazifalari:

• mamlakatda amalga oshirilayotgan ma’naviy-ma’rifiy ishlar bilan bog‘liq tadbirlarni o‘tkazish;
• talaba-yoshlarda ma’naviy-axloqiy, estetik, siyosiy va huquqiy fazilatlarni shakllantirish;
• milliy urf-odat va qadriyatlarga asoslangan anjuman va uchrashuvlar tashkil etish;
• talabalarning ruhiy va jismoniy kamolotiga qaratilgan ishlarga ko‘maklashish;
• universitetda ma’naviy-axloqiy tarbiya ishlarini belgilash, ular uchun zarur me’yoriy hujjatlar va tavsiyalar ishlab chiqish;
• Respublika Ma’naviyat va ma’rifat markazining shahar va tuman bo‘limlari, jamg‘armalar va jamoat tashkilotlari bilan hamkorlikda ish olib borish.

• fakultetlardagi ma’naviy-axloqiy ishlarni va bu boradagi vazirlik buyruq va ko‘rsatmalari ijrosini nazorat qilish;
• dekanlarning ma’naviy-axloqiy ishlar bo‘yicha o‘rinbosarlarini tayinlash va lavozimdan ozod etishga oid yig‘ilishlarda tavsiyalari bilan qatnashish;
• fakultet dekanlari va kafedra mudirlariga ma’naviy-axloqiy masalalar bo‘yicha ko‘rsatma va tavsiyalar berish;
• professor-o‘qituvchilarning yillik yuklamasidagi “Ma’naviy-ma’rifiy ishlar” bandi bajarilishini nazorat qilish va baholash;
• dekan o‘rinbosarlarining ma’naviy-axloqiy tarbiya bo‘yicha ishlari yuzasidan har semestr yakunida hisobot berish;
• namuna ko‘rsatgan bo‘lim, fakultet va kafedra jamoalarini rag‘batlantirish bo‘yicha tavsiyalar berish.

• fakultetlar, bo‘lim va kafedralar, Axborot-resurs markazi va talabalar turar joylarida ma’naviyat va ma’rifat burchaklari, kitob javonlari, ko‘rgazma va stendlar tashkil etildi;
• Murabbiylar kengashi tuzildi va unga tajribali professor-o‘qituvchilar jalb qilindi; kengash murabbiylik soatlari, talabalarning darsga qatnashishi va reyting nazoratlari, ota-onalar bilan uchrashuvlar kabi masalalarni muhokama qiladi;
• mamlakatda amalga oshirilayotgan islohotlar mohiyatini tushuntirish uchun Prezident Sh.M. Mirziyoyevning Oliy Majlisdagi ma’ruzalari va intervyulari bo‘yicha maxsus o‘quv kurslari tashkil etildi;
• ijtimoiy-gumanitar kafedralar ko‘plab anjumanlar, davra suhbatlari va bahs-munozaralar o‘tkazdi;
• terrorizm, diniy ekstremizm, aqidaparastlik, huquqbuzarlik, giyohvandlik va OITSning oldini olish bo‘yicha huquq-tartibot va sog‘liqni saqlash idoralari bilan hamkorlikda kompleks tadbirlar o‘tkazilib, talabalar shu mavzudagi film va spektakllarga olib borildi.

Universitetda Mustaqillik kuni, 1-oktabr — O‘qituvchi va murabbiylar kuni, 21-oktabr — O‘zbek tiliga davlat tili maqomi berilgan kun, 8-dekabr — Konstitutsiya kuni, Yangi yil, 14-yanvar — Vatan himoyachilari kuni, 8-mart — Xalqaro xotin-qizlar kuni, 21-mart — Navro‘z va 9-may — Xotira va qadrlash kuni keng nishonlanadi.

Talabalarning bo‘sh vaqtini mazmunli tashkil etish universitet ma’muriyatining diqqat markazida. Universitetda 28 ta talaba klubi faoliyat yuritadi; ayniqsa “Zakovat”, “Yosh kitobxon”, “Ulug‘bek vorislari”, “Ulug‘bek yulduzlari”, “Munozara” va “Mushoira” klublari talabalar orasida mashhur. Klublarda 1 000 dan ziyod talaba qatnashadi.

Talabalar turar joylarida ma’naviyat va ma’rifat xonasi, oshxona, dush, kir yuvish xonasi, dam olish va o‘quv zallari hamda qizlar uchun gigiyena xonalari tashkil etilgan.

Ma’naviy-axloqiy tarbiya ishlari bo‘yicha prorektor lavozimida dotsentlar K.G‘. G‘aniyev va B.S. Qarshiyev, ma’naviyat va ma’rifat bo‘limi boshlig‘i lavozimida S.N. Norov faoliyat ko‘rsatgan. Keyinchalik yoshlar masalalari va ma’naviy-ma’rifiy ishlar bo‘yicha prorektor O. Hayitov, talabalar dekanati dekani B. Saidov bo‘lgan.

Hozirda yoshlar masalalari va ma’naviy-ma’rifiy ishlar bo‘yicha prorektor — Sh.X. Uzoqov, talabalar dekanati dekani — Sh.U. Bozorov.