Xo‘jalik bo‘limi

Ustavda nazarda tutilgan faoliyatni amalga oshirish uchun davlat (ta’sischi) universitetga operativ boshqarish huquqi bilan binolar, inshootlar, mulkiy majmualar, oliy ta’lim muassasasi pasportiga muvofiq asbob-uskunalar, shuningdek iste’mol, ijtimoiy, madaniy va boshqa maqsadlar uchun zarur mol-mulkni biriktirgan.

Universitet faqat O‘zbekiston Respublikasi Vazirlar Mahkamasining qarori bilan davlat tasarrufidan chiqarilishi va xususiylashtirilishi mumkin bo‘lgan obyektlar qatoriga kiritilgan. Unga ajratilgan yer uchastkalari muddatsiz tekin foydalanishga berilgan.

Jismoniy va yuridik shaxslar sovg‘a, hadya yoki vasiyat tariqasida bergan pul mablag‘lari va mol-mulk, universitet faoliyati natijasida yaratilgan intellektual va ijodiy mahsulotlar, shuningdek o‘z faoliyatidan olinadigan daromadlar va ular hisobiga sotib olingan mol-mulk universitet egaligida bo‘ladi.

Universitet mol-mulkni ijaraga oluvchi va ijaraga beruvchi bo‘lishi mumkin. O‘zbekiston Respublikasining Fuqarolik kodeksi va Vazirlar Mahkamasi tasdiqlagan “Davlat mulkini ijaraga berish tartibi to‘g‘risida”gi nizomga muvofiq u o‘ziga biriktirilgan binolar, inshootlar va ularning qismlari, asbob-uskunalar, transport vositalari va boshqa mol-mulkni — ijaraga berilishi qonunga zid bo‘lmagan hollarda — Ilmiy kengash roziligi bilan, tasarruf etish huquqisiz, belgilangan narxlarda ijaraga beradi.

Ijara haqidan tushgan mablag‘lar ta’lim jarayonini ta’minlash va rivojlantirish hamda moddiy-texnik bazani mustahkamlashga sarflanadi.

Universitetning ta’lim faoliyati davlat granti asosida mutaxassislar tayyorlash uchun ajratilgan byudjet mablag‘lari, davlat normativlari asosida kadrlarni qayta tayyorlash va malakasini oshirish uchun ajratilgan mablag‘lar, shuningdek byudjetdan tashqari mablag‘lar, jumladan talabalar va tinglovchilarni to‘lov-shartnoma asosida o‘qitishdan tushgan mablag‘lar hisobidan moliyalashtiriladi.

Universitet asosiy faoliyatiga zarar yetkazmagan holda ta’lim va boshqa sohalarda pullik xizmatlar ko‘rsatishi mumkin; uning tadbirkorlik faoliyati ustavdagi vazifalarga mos bo‘lishi kerak. Pullik ta’lim xizmatlari byudjet hisobidan moliyalashtiriladigan ta’lim faoliyati doirasida yoki uning o‘rniga ko‘rsatilishi mumkin emas.

Universitet o‘z mulki bilan xo‘jalik jamiyatlari va shirkatlarning ustav jamg‘armasida qatnashish, pullik ta’lim, konsultatsiya va boshqa xizmatlar narxlarini belgilash hamda soliqlar va boshqa majburiy to‘lovlardan keyin qolgan daromadni mustaqil tasarruf etish huquqiga ega. U qonunchilik va ustavga zid bo‘lmagan shartnomalar tuzish, majburiyat va boshqa shartlarni belgilash masalalarini mustaqil hal qiladi.

Lavozim maoshlari mehnat shartnomasi tuzilayotganda “Oliy ta’lim muassasalari xodimlari mehnatiga haq to‘lash to‘g‘risida”gi nizom va mehnatga haq to‘lashning yagona tarif setkasi asosida belgilanadi. Maosh xodimning funksional vazifalari va mehnat shartnomasida nazarda tutilgan ishlarni bajargani uchun to‘lanadi.

Qo‘shimcha haq, ustamalar va boshqa moddiy rag‘batlantirish miqdorini universitet ish haqi fondi doirasida, qonunchilikda belgilangan tartibda mustaqil belgilaydi. Belgilangan maoshlar attestatsiya natijalariga ko‘ra faqat oshirish maqsadida qayta ko‘rib chiqilishi mumkin.

Universitet o‘zida tashkil etilgan jamoat tashkilotlariga faoliyati uchun zarur xonalarni ajratadi va ularning tozaligini ta’minlaydi. Tibbiy-sanitariya bo‘limiga, shuningdek universitet hududida joylashgan yoki uning balansidagi, talabalar, tinglovchilar va xodimlarga xizmat ko‘rsatuvchi oshxona va boshqa umumiy ovqatlanish shoxobchalariga isitish, yoritish va suv ta’minoti bilan ta’minlangan xonalar ajratiladi.

Binolarni ta’mirlash, rekonstruksiya qilish va yangilarini qurish hamda ularni moliyalashtirish qonunchilikda belgilangan tartibda amalga oshiriladi.

2020-yil yanvar–avgust oylarida universitet byudjet mablag‘lari hisobidan 15 mlrd 51 mln so‘m bilan moliyalashtirildi. Shundan 9 mlrd 764 mln so‘m ish haqi va undan ajratmalarga, 5 mlrd 154 mln so‘m stipendiyalarga, 133 mln so‘m boshqa xarajatlarga sarflandi: xizmat safarlari — 4 mln, kommunal xizmatlar — 94 mln, asosiy vositalar xaridi — 7 mln, saqlash va joriy ta’mirlash — 28 mln so‘m.

Shu davrda byudjetdan tashqari to‘lov-kontrakt mablag‘lari tushumi 16 mlrd 640 mln so‘mni tashkil etdi; yil boshidagi hisob raqamidagi 9 mlrd 230 mln so‘m qoldiq bilan jami daromad 25 mlrd 870 mln so‘m bo‘ldi.

To‘lov-kontrakt mablag‘larining 8 oylik xarajatlari 22 mlrd 688 mln so‘mni tashkil etdi: ish haqi va undan ajratmalar — 17 mlrd 921 mln, stipendiyalar — 3 mlrd 799 mln, boshqa xarajatlar — 968 mln so‘m (xizmat safarlari — 44 mln, kommunal xizmatlar — 470 mln, asosiy vositalar xaridi — 1 mln, saqlash xarajatlari — 81 mln, vazirlikning oliy ta’lim muassasalari moddiy-texnik bazasini rivojlantirish jamg‘armasiga ajratma, ma’naviy-ma’rifiy tadbirlar va moddiy yordam — 372 mln so‘m).

Bo‘lim boshlig‘i lavozimi hozircha bo‘sh. Qabul: har kuni. Telefon: (8 366) 237-47-88.