Ta’lim sifatini nazorat qilish bo‘limi
Ta’lim sifatini nazorat qilish bo‘limi (Sifat nazorati koordinatorligi) o‘quv jarayoni va dars berish sifatini tahlil qiladi, bilimlarni baholashda shaffoflik va xolislikni ta’minlaydi va universitetda ta’lim sifatining ichki nazorat tizimini yuritadi.
Mas’ul xodimlar
Bo‘lim haqida
Ta’lim sifatini nazorat qilish bo‘limi (Sifat nazorati koordinatorligi) O‘zbekiston Respublikasi Vazirlar Mahkamasining 2017-yil 18-iyuldagi “O‘zbekiston Respublikasi Vazirlar Mahkamasi huzuridagi Ta’lim sifatini nazorat qilish davlat inspeksiyasi faoliyatini tashkil etish to‘g‘risida”gi 515-son qaroriga muvofiq tuzilgan va O‘zbekiston Respublikasi Oliy ta’lim, fan va innovatsiyalar vazirining 2023-yil 27-martdagi 72-son buyrug‘i bilan qayta tashkil etilgan.
Universitet tuzilmasida bo‘lim strategik rivojlantirish bo‘yicha birinchi prorektorga bo‘ysunadi va bevosita vazirlikning Ta’lim muassasalari faoliyatini tashkil etish, litsenziyalash va ta’lim sifatini ta’minlash departamentiga hisobdor. Bo‘lim ta’lim sifatiga ta’sir etgan omillar bo‘yicha tahliliy ma’lumotlar tayyorlab, ularni universitet rektori va vazirlikka taqdim etadi.
Asosiy vazifalari
- o‘quv jarayonining sifatli tashkil etilganligini va professor-o‘qituvchilarning dars berish sifatini muntazam tahlil qilish;
- talabalar bilimining davlat ta’lim standartlariga muvofiqligini va fanlarni o‘zlashtirish darajasini o‘rganish va tahlil qilish;
- ta’lim sifatini ta’minlay oladigan professor-o‘qituvchilar tarkibini shakllantirishda, jumladan salohiyatli o‘qituvchilarni tanlash va ishga qabul qilishda ishtirok etish;
- talabalar bilimini nazorat qilish va baholashda shaffoflik va xolislikni ta’minlash bo‘yicha samarali choralar ko‘rish;
- universitetda plagiatga qarshi dasturlarning joriy etilishini ta’minlash va ko‘chirmachilikka qarshi ishlarni tizimli tashkil etish;
- ta’lim sifatiga ta’sir etgan omillar bo‘yicha tahliliy ma’lumotlar tayyorlash.
Faoliyat maqsadlari
- universitet va uning tuzilmalarida ta’lim sifatini oshirish;
- universitetning milliy va xalqaro reytingini oshirish bo‘yicha ishlarni muvofiqlashtirish;
- universitetda ta’lim sifatining davlat ta’lim standartlariga muvofiqligini ta’minlash;
- universitetda ta’lim jarayonini nazorat qilishning ichki tizimini joriy etish.
Ta’lim sifatini oshirish yo‘lida
Oliy ta’lim sifatini oshirish va uning jahon ta’lim makoniga integratsiyalashuvini ta’minlash maqsadida universitetda 2015-yildan boshlab o‘quv jarayoni ECTS tamoyillariga asoslangan kredit-modul tizimi bo‘yicha tashkil etilgan. Universitet rektori Chidem Janbay Turkyilmaz tomonidan tasdiqlangan universitetni 2030-yilgacha rivojlantirish Konsepsiyasi va Dasturida ta’lim sifati va yuqori malakali kadrlar tayyorlash asosiy ustuvor yo‘nalish sifatida belgilangan.
O‘quv jarayonini raqamlashtirish, innovatsion pedagogik texnologiyalarni qo‘llash va baholashning shaffof usullaridan foydalanish ta’lim sifatini oshirishning asosiy omili sifatida qaralmoqda. Talabalar va professor-o‘qituvchilarning akademik mobilligi ham ta’lim sifatiga ijobiy ta’sir ko‘rsatmoqda: 2024-yilda universitetning 61 nafar yetakchi professor-o‘qituvchisi akademik mobillik dasturlari bo‘yicha stajirovka o‘tagan va malaka oshirgan, hamkor xorijiy universitetlarning 22 nafar o‘qituvchisi universitetda mahorat darslari o‘tkazgan yoki ma’ruza o‘qigan. Natijada xorijiy oliy ta’lim muassasalarida joriy etilgan ilg‘or ta’lim texnologiyalarini universitetda qo‘llash imkoniyati paydo bo‘ldi.
Sifat nazorati koordinatorligi tomonidan o‘quv jarayonini tashkil etish bo‘yicha yo‘lga qo‘yilgan tizimli ishlar o‘qituvchilarning o‘quv va ilmiy-tadqiqot faoliyati samaradorligini oshirishga ham xizmat qilmoqda.
