O‘zbekiston Respublikasi Prezidentining tashabbusi bilan ta’til davrida talabalarning bo‘sh vaqtini mazmunli tashkil etish maqsadida amalga oshirilayotgan “Dolzarb 90 kun” dasturining “Vatan bo‘ylab sayohat qil!” loyihasi doirasida Qurilish fakulteti talaba-yoshlari uchun navbatdagi sayohat tashkil etildi.
Ular Samarqand shahrida joylashgan Nodir Devonbegi me’moriy yodgorligi hamda Xo‘ja Ahror Vali xonaqohida bo‘lishdi.
Tarixiy manbalarga ko‘ra, Nodir Devonbegi madrasasi mashhur Nodir Devonbegi mablag‘i hisobidan bunyod etilgan. Madrasa Xo‘ja Ahror xonaqohi yaqinida joylashgani sababli xalq orasida Xoja Ahror madrasasi yoki peshtoqidagi quyosh va sherlar tasvirlari bois Kichik Sherdor madrasasi nomi bilan ham ataladi.
Bir qavatli madrasa hovlisining ikki tomonida ayvonlar, hujralar, masjid va darsxona joylashgan. Bosh peshtoq bezaklari feruza, yashil va sariq rangdagi mayda naqshlar bilan nafislik va uyg‘unlik yaratgan.
